Stór dagur hjá Hjálparsveitinni Dalbjörg!

Eins og flestir vita festum við kaup á nýju húsnæði fyrir sveitina í Hrafnagilshverfinu, nánar tiltekið gamla Blómaskálann Vín. Þann 23. nóvember fluttum við allt okkar hafurtask úr Bangsabúð við Steinhóla, sem hefur þjónað Hjálparsveitinni Dalbjörg síðustu 26 árin. Það var því með nokkrum trega sem gamla húsnæðið var kvatt og búnaðurinn fluttur á nýjan stað. 

 

Nýja húsnæðið mun nýtast Dalbjargarfélögum vel á komandi árum og rúmar vel allan okkar búnað, tæki og tól. Mikil vinna bíður okkar við að standsetja húsið, en við sjáum fram á skemmtilega tíma við það starf og teljum að þetta muni efla Dalbjörg enn frekar í starfi sínu.