Útköll og annir síðustu daga

17.09.2012

Grafið eftir kindum við Baldursheim

Enginn hefur farið varhluta af því sem gengið hefur á hér allt í kringum okkur síðustu daga. Björgunarsveitir og bændur hafa leitað eftir fé víða og höfum við í Dalbjörg tekið þátt í því á fullu.

Um 20 manns hafa tekið þátt í þessum útköllum frá okkur og skilað yfir 480 vinnustundum. Tækin okkar hafa verið keyrð yfir 3200 km þessa daga. Auk okkar tækja höfum við fengið að láni breyttan jeppa, tvo snjósleða, kerrur og síðan fengum við mikla hjálp frá Hjalta á Akri en hann flutti snjóbílinn fyrir okkur.

Mannskapurinn sem fékk inni á Heiðarbæ kunni staðarhöldurum miklar þakkir fyrir frábærar móttökur. Eins var frábært að sjá yngstu björgunarsveitarfélagana og fá þeir mikið hrós fyrir sinn þátt í þessum verkefnum og þá sérstaklega Hreiðar "Víddason" en hann tók þátt í þeim öllum.

Þriðjudagur
Eftir að veðrið slotaði á þriðjudagsmorgun var óskað eftir mannskap og tækjum upp í Mývatssveit þar sem bændur vissu af mörgum kindum undir snjó. Sendum við þá strax 5 manns á Dalbjörg 2 og tvo sleðamenn upp í sveit og unnu þeir fram í myrkur við að grafa upp fé.

Miðvikudagur
Á miðvikudagsmorgun sendum við öll okkar tæki og meira til upp á Þeistareykjasvæði. Það var stór floti sem lagði af stað kl 7 frá Leirunesti, Þrír jeppar með þrjá sleða í eftir dragi, vörubíll með snjóbílinn og mannskapsbílinn okkar. Fram í myrkur unnu þrír sleðamenn, sex manns á björgunarsveitarjeppunum tveimur og tveir menn á snjóbílnum við að grafa, finna og ferja kindur á svæðinu.

Fimmtudagur
Áfram hélt leitin á fimmtudagsmorgun og aftur fór vaskur hópur sex manna á svæðið til móts við þrjá okkar manna sem gist höfðu í góðu yfirlæti á Heiðarbæ um nóttina. Haldið var áfram frá deginum áður á jeppum og sleðum en snjóbíllin sem varð fyrir smá tjóni var komið fyrir á fletinu sínu.

Föstudagur
Á föstudeginum fengu björgunarsveitarmenn á svæði 11 pásu enda margir búnir að vera þrjá daga við erfiða leit. Flestir frá okkur hafa þá loks haft tækifæri á að sinna búpeningi og öðru heima fyrir sem sat á hakanum og en aðrir nýttu lausann tíma í að hlúa að búnaði og tækjum sveitarinnar.

Laugardagur
Á laugardagsmorguninn var síðan aftur óskað eftir liðsinni okkar og nú í Bárðardal við Bjarnarstaði. sex manns á þremur sleðum og Dalbjörg 1 fóru í bítið og unnu fram í myrkur við leit.

Eins og sést þá hefur mikið mætt á mannskap og tækjum sveitarinnar.
Nú tekur við að koma öllum búnaði á sinn stað og gera við þau tæki sem hafa laskast. Við vitum ekki hvenær næsta kall kemur þannig að ef menn vita um einhvern búnað sveitarinnar sem er ekki á sínum stað eða í lagi, látið stjórn vita af því.